ཨ་རིའི་ནིའུ་ཡོག་མདོ་ཁམས་ཆུ་སྒང་གིས་༸གོང་ས་མཆོག་མཇལ་ཁ་ཞུས་པ།
ཨ་རིའི་གྲོང་ཁྱེར་ནིའུ་ཡོཀ་མདོ་ཁམས་ཆུ་བཞི་སྒང་དྲུག་ནས་གནས་ཚུལ་འབྱོར་གསལ་ལྟར་ན། ཟླ་ཚེས་ཁ་གསལ་མ་འཁོད་ཀྱང་འདི་ལོའི་ཟླ་ ༥ ཚེས་ ༢༣ ཡས་མས་ཞིག་ལ། ནིའུ་ཡོཀ་གྲོང་ཁྱེར་དུ་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཞབས་པད་ཆིབས་བསྒྱུར་གནང་སྐབས་དང་བསྟུན་ས་གནས་ཆུ་སྒང་གི་རྒྱུན་ལས་རྣམས་ལ་མཇལ་འཕྲད་ཀྱི་སྐལ་བཟང་གོ་སྐབས་བྱུང་བ་མ་ཟད་ས་གནས་ཆུ་སྒང་གི་ལས་བསྡོམས་ཞིག་ཀྱང་སྤྱན་འབུལ་ཞུས་ཡོད་འདུག དེའང་ཨ་རིའི་ནིའུ་ཡོཀ་ས་གནས་མདོ་ཁམས་ཆུ་བཞི་སྒང་དྲུག་གི་ཐོག་མ་ནས་འདས་མ་འོངས་ད་ལྟ་སོགས་ཀྱི་གནས་སྟངས་དང་། ཚོགས་པ་འདིས་བོད་བསྟན་སྲིད་གཉིས་ཀྱི་ཆེད་དུ་དུས་དང་བསྟུན་པའི་ལས་འགུལ་སྤེལ་བ་ཁག་དང་། དེ་བཞིན་རྒྱལ་ཕྱི་ནང་གི་དམངས་གཙོ་དོན་གཉེར་ཅན་དང་། བོད་དོན་རྒྱབ་སྐྱོར་བ། དབུས་མདོ་ཁམས་ཆུ་བཞི་སྒང་དྲུག་གི་མཛད་གཙོ་དང་སློབ་སྟོན་པ་སོགས་གལ་ཆེའི་མི་སྣ་ཁག་གདན་ཞུས་ཀྱིས་གནད་ལ་སྨིན་པའི་བགྲོ་གླེང་སོགས་གང་འགབ་ཞུས་ཡོད་པའི་སྐོར་དང་། ཉེ་བའི་ཆར་བོད་ཁམས་སྐྱེ་རྒུར་རང་བྱུང་གི་གནོད་འཚེས་མི་མང་ཁྲི་ཕྲག་རྒལ་བར་དཀའ་སྡུག་ཚད་ལས་འདས་པར་བྱུང་བ་རྣམས་ལ་གདུང་སེམས་མཉམ་བསྐྱེད་ཀྱི་ལས་འགུལ་གཞི་རྒྱ་ཆེ་བར་ཞུས་ཡོད་པའི་སྐོར་སོགས་ཞུས་ཡོད་འདུག
དེ་བཞིན་༸གོང་ས་མཆོག་གིས་ཀྱང་མདོ་ཁམས་ཆུ་བཞི་སྒང་དྲུག་གི་ཚོགས་པ་འདི་ཉིད་བྱས་རྗེས་ཅན་ཞིག་དང་བསྟན་སྲིད་ལ་སྨིན་པའི་ལས་དོན་རྒྱ་ཆེར་བྱས་ཡོད་པ་དགོངས་དབྱིངས་སུ་མངའ་ཡོད་པའི་བཀའ་སློབ་བཀའ་དྲིན་རྒྱ་ཆེར་བསྩལ་ཡོད་པ་སོགས་ཀྱི་གནས་ཚུལ་ཐོན་ཡོད་པ་རེད།
