ཕྱི་ལོ་ ༡༩༨༥ ནས་ ༢༠༠༣ བར་གྱི་མདོ་ཁམས་ཆུ་སྒང་དབུས་སྤྱི་ཁྱབ་རྒྱུན་ལས་ཁང་ནས་ཡོངས་ཁྱབ་བསྩལ་གནང་བའི་གསུང་འཕྲིན་ཁག་བཞུགས་སོ།།

ྋམདོ་ཁམས་ཆུ་བཞི་སྒང་དྲུག་བསྟན་སྲུང་དྭང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༢༧ འཁོར་བའི་དུས་དྲན་ཐོག་གཏམ་བཤད་སྤེལ་བའི་ཡོངས་ཁྱབ་གསུང་འཕྲིན།
    ྋསྐུ་མགྲོན་རྣམ་པ་དང༌། སྤུན་ཟླ་སེར་སྐྱ་མི་མང་ལྷན་རྒྱས་ལ། མཛའ་བརྩེ་དང་ལྡན་པའི་གུས་བཏུད་ཀྱི་མཚམས་འདྲི་དང་བཅས་བཀྲིས་བདེ་ལེགས་ཞུ་བཞིན་ཡོད།
བོད་རྒྱལ་ལོ་ ༢༡༡༢ ཤིང་གླང་ཟླ་ ༤ ཚེས་ ༢༨ ཕྱི་ལོ་ ༡༩༨༥ ཟླ་ ༦ ཚེས་ ༡༦ ཉིན་མོ་འདི་ནི་ལྷོ་ཁ་ལྕགས་ཚ་གྲི་གུ་ཐང་དུ་ཆུ་བཞི་སྒང་དྲུག་ནས་བསྟན་སྲུང་དང་བླངས་དམག་གི་སྒྲིག་འཛུགས་དངོས་སུ་ཚུགས་ཏེ་མི་ལོ་ཧྲིལ་པོ་ཉི་ཤུ་རྩ་བདུན་འཁོར་བའི་དུས་དྲན་བྱེད་པའི་ཉིན་མོ་དེ་རེད།
ད་ལྟའི་དུས་དྲན་ལ་སྲུང་བརྩི་ཞུ་དགོས་པ་ནི་སྤྱིར་བཏང་གི་ལམ་ལུགས་ལྟ་བུ་དང་འདྲ་ཆགས་མཛེས་རྒྱན་ལྟ་བུུ་བྱེད་པ་ཞིག་མིན་པར། སྒྲིག་འཛུགས་འདི་བཞིན་བཙུགས་དགོས་པའི་རྒྱུ་མཚན་དང་དམིགས་ཡུལ་ངེས་ཅན་ཞིག་ཡོད་པ་ནི། ༡༩༤༩ ལོར་རྒྱ་མི་དམར་པོའི་རྒྱ་སྐྱེད་རིང་ལུགས་ཀྱི་བསམ་ངན་ཁོག་ཏུ་བཅུག་སྟེ་བོད་ལྗོངས་རྒྱལ་ཁབ་ཀྱི་མཐའ་དབུས་ཆེ་རྒུ་ཡོངས་རྫོགས་འདོད་རྔམ་ཟ་སེམས་ཀྱི་འགྲམ་ཆུ་གདངས་བ་དང་ཆབས་ཅིག་རྒྱ་ནག་དམར་པོའི་ལུགས་ངན་རྒྱུད་རློམ་ཐོག་བོད་ཀྱི་མཐའ་མཚམས་ཁག་ནས་རྒྱ་དམག་གྲངས་མེད་དང༌། གོ་མཚོན་སྣ་དགུ་དང་བཅས་རྡུག་ལག་དངོས་སུ་བརྐྱངས་ཏེ་རིམ་བཞིན་བཙན་འཛུལ་གྱིས་མང་སྣེ་ཉུང་གིས་མ་བརྟན་པར། མཐར་ ༡༩༥༡ ལོར་རྒྱལ་ས་ལྷ་ས་དང་བཅས་པ་བཙན་བཟུང་ཇི་བྱས་ཚང་མས་མཁྱེན་གསལ་ལྟར་དང༌། རྒྱ་མིས་དང་པོར་བོད་ས་བཙན་འཛུལ་བྱེད་སྐབས་ནས་བཟུང་ང་ཚོ་ཆུ་བཞི་སྒང་དྲུག་གིས་མ་གྲོས་བསམ་པ་གཅིག་མཐུན་གྱི་སྒོ་ནས་བོད་ལྗོངས་བསྟན་སྲིད་རང་དབང་སྲུང་སྐྱོབ་ཀྱི་ཆེད་དུ་ཉིན་བསྟུད་ལོ་ནས་ལོ་བསྟུད་དེ་ངོ་རྒོལ་གདོང་ལེན་གྱི་ཡ་ལན་སྤྲད་དེ་སྡོད་བཟོད་མི་བདེ་བ་དགྲ་འཐབ་མི་མཐུད་བྱས་པ་རེད།
ད་དུང་མི་མཐུད་བསྟན་སྲིད་རང་དབང་ལ་བདོ་བའི་བྱ་སྤྱོད་ཉིན་རེ་ལས་ཉིན་རེར་ཇེ་སྡུག་ཇེ་ཞན་གྱི་བོད་གཞུང་གི་ཐོབ་དབང་རྣམས་རིམ་བཞིན་བཙན་འཕྲོག་དང༌། བོད་འབངས་རྣམས་དུམ་བུ་ནས་དུམ་བུར་གཏོང་བ། རྒྱུ་ནོར་ལོངས་སྤྱོད་གང་ན་ཅི་ཡོད་ཟ་འདོད་ཐོ་ལེན། བོད་མི་མང་རྣམས་ལ་སྡུག་མནར་གཏོང་རྒྱུའི་ལས་འགུལ་མིང་ཐོ་བཀོད་ལེན་བཅས་བྱེད་པ་དང༌། སངས་རྒྱས་ཀྱི་བསྟན་པ་ལ་དུག་ལྟར་བརྩིས་ནས། བསྟན་འཛིན་གྱི་སྐྱེས་བུ་དམ་པ་རྣམས་ཀྱི་གཙོས་འཕགས་པའི་དགེ་འདུན་ཡོངས་ལ་དགྲ་ལྟར་འཛིན་པ་སོགས་བྱེད་པ་དང༌། ལྷག་པར་དུ་སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ནས་ཐབས་མཁས་དང་མཛའ་བཤེས་ཀྱི་རྣམ་པ་ཇི་ལྟར་མཛད་ཀྱང་རྒྱ་དམར་གྱི་ངོས་ནས་མིག་གི་མཛེར་མ་ལྟ་བུའི་ཞེ་ངན་ཕུགས་བཅང་གིས་དོན་དུ་བོད་ཟེར་བ་མིང་ཙམ་ཡང་མེད་པ་བཟོ་རྒྱུའི་འཆར་ངན་ཇི་སྙེད་ཅིག་བྱས་དང་བྱེད་བཞིན་པ་མ་ཟད། ༡༩༥༦ ལོར་འགོར་བོད་ཤར་ཕྱོགས་མདོ་ཁམས་ཀྱི་ས་ཁུལ་གང་སར་དམངས་གཙོ་བཅོས་བསྒྱུར་ཟེར་བའི་མ་རུང་བའི་ལས་འགུལ་ཞིག་དངོས་སུ་བཙུགས་པ་དང་འབྲེལ་བླ་མ་མི་དཔོན་ཆེ་ཁག་མིང་འདོགས་འདྲ་མིན་སྣ་ཚོགས་ཀྱིས་འཛིན་བཟུང་དང༌། རྒྱ་ནག་ནང་གཡོ་འཁྲིད་བྱེད་པ་སོགས་མདོར་ན་བོད་མིའི་བློ་དང་གཏན་ནས་མི་འཚམས་པའི་སྡུག་རྩུབ་དང༌། གཡོ་བྱུས་ལག་ལེན་དངོས་སུ་བསྟར་བྱུང་བ་བཅས་ལ་བརྟེན། མདོ་ཁམས་ཀྱི་ས་ཁུལ་ཁུངས་སོ་སོ་ནས་སོ་སོ་ནས་ངོ་རྒོལ་འཐབ་འཛིང་མི་མཐུད་ནས་བྱས་པ་སོགས་ཀྱི་སྐབས་དེར་ཨ་འབྲུག་མགོན་པོ་བཀྲ་ཤིས་ཅན་རྒྱལ་ས་ལྷ་སར་ཡོད་པའི་ཚོང་རིགས་དང༌། ཆུ་སྒང་མི་སྣ་གནད་ཡོད་ཚང་མར་བློ་སེམས་གཅིག་མཐུན་གྱི་སྒོ་ནས་བོད་གཞུང་དགའ་ལྡན་ཕོ་བྲང་པ་ཆེན་པོའི་དབུ་འོག་དཔུང་འདེགས་ཀྱི་ལྷག་བསམ་རས་དཀར་དྲི་མ་མེད་པས་སངས་རྒྱས་ཀྱི་བསྟན་པ་རྒྱས་ཐབས་དང༌། བོད་གཞུང་འབངས་ཡོངས་ལ་བདེ་སྐྱིད་འབྱུང་ཐབས་བཅས་ཀྱི་ཆེད་དུ། དགོན་ཁག་རྣམས་ལ་བསྙེན་བཀུར་དང༌། ལྷ་སྲུང་རྣམས་ལ་གསོལ་ཁ། གཙུག་ལག་ཁང་དང་གནས་ཆེན་ཁག་ལ་མཆོད་འབུལ། ལྷ་བླའི་དགོངས་བབས་ཇི་ལྟར་སྐུ་རིམ་ཞབས་བརྟན་གཏོར་རྒྱག་ཟོར་འཕེན་སོགས་རྒྱ་ཆེར་གྲངས་མང་ཞུས་པ་དང༌།
བོད་ལྗོངས་ཆོལ་ཁ་གསུམ་གྱི་ཁོངས་སུ་གཏོགས་པའི་བོད་མི་ཡོངས་རྫོགས་ཀྱི་མགོ་ལུས་སྲོག་གསུམ། ཆོས་སྲིད་གཉིས་ཀྱི་བདག་པོ་ྋགོང་ས་ྋསྐྱབས་མགོན་ྋརྒྱལ་བའི་དབང་པོ་གཅིག་ཉིད་ཡིན་པ་ལ་ཡིན་པ་དངོས་སུ་བསྟན་པའི་ཆེད་དང༌། སྐུ་ཚེ་མཛད་འཕྲིན་གོང་འཕེལ་ཐུགས་བཞེད་ལྟར་འགྲུབ་ཆེད་བཅས་སུ་ ༡༩༥༧ ལོར་གསེར་ཁྲི་ཁམས་གསུམ་ཟིལ་གནོན་ཞེས་མཚན་གསོལ་བ་དེ་ཡང་བཟོ་ལེགས་གྲུབ་མཚམས་ྋགོང་ས་ལྷ་མི་འི་རྣམ་འདྲེན་༧སྐྱབས་མགོན་ཕྱག་ན་པདྨོ་མཆོག་སྐུ་ཚེ་བསྐལ་པ་ཁྲི་ཕྲག་བར་དུ་བརྟན་པར་བཞུགས་སུ་གསོལ་བའི་བརྟན་བཞུགས་བསྟར་འབུལ་དགྱེས་བཞེས་དང་འབྲེལ། ཇོ་བོ་ཡིད་བཞིན་ནོར་བུའི་མདུན་གྱི་གཙོས་གྲྭ་ས་སེ་འབྲས་དགའ་གསུམ་དང༌། བསམ་ཡས་མི་འགྱུར་ལྷུན་གྱི་གྲུབ་པའི་གཙུག་ལག་ཁང་ལ་སོགས་པ་བསྟན་གནས་ལྷ་ཁང་ཚང་མར་རིན་ཆེན་དང་གཉིས་ལས་བསྐྲུན་པའི་མཆོད་རྫས་བསྟན་བཞག་དང༌། མཆོད་རྩར་སྦྱོར་འཇགས་བཅས་འབུལ་འཇོག་བྱས་པར་བོད་ཆོལ་ཁ་གསུམ་ཡོངས་ལ་གྲགས་ཆེ་བ་བྱུང་ཡོད་གཤིས། ལས་སྨོན་ལོག་པའི་བཙན་རྒྱལ་རྒྱ་དམར་ནི་ཁོང་ཁྲོའི་ཞེ་སྡང་རི་མེ་འབར་བའི་རྣོ་ངར་མཚོན་ཆ་དྲག་ཏུ་ཟེང་བའི་འོག་ནས་ཆོལ་གསུམ་བོད་མི་ཉེས་མེད་རྣམས་ལ་སྡུག་སྦྱོང་མནར་གཅོད་བསད་བཏུབ་དང༌། བསྟན་དགོན་བླ་སྤྲུལ་སོགས་རིམ་བཞིན་རྩ་མེད་བཏང་བའི་ལས་འགུལ་དངོས་སུ་བརྩམས་པ་འཇིག་རྟེན་མི་སྤྱོད་ལས་འདས་པའི་མ་རབས་སྲོལ་ངན་ནང་གི་སྲོལ་ངན་ལག་ལེན་བསྟར་བའི་མུར། མདོ་ཁམས་ཆུ་བཞི་སྒང་དྲུག་གི་མི་མང་ནས་སྡུག་ཁུར་བཟོད་སྒོམ་མ་ཐུབ་པས་སྨད་ཕྱོགས་ནས་འཐབ་འཛིང་བྱེད་བཞིན་པའི་སྐབས་སུ་ལྷ་ལྡན་དུ་ཡོད་པའི་རྒྱལ་གཅེས་དཔའ་བོ་ཡོངས་ཀྱི་མཆོག་གྱུར་ཨ་འབྲུག་མགོན་པོ་བཀྲ་ཤིས་མཆོག་དང༌། ཨ་མདོ་སྦྱིན་པ་རྒྱ་མཚོ་ཅན་མདོ་ཁམས་ཀྱི་ཆེ་མགོ་མི་སྣ་མང་པོ་ནང་བསྡུར་དང་འབྲེལ་གསང་སྟབས་ཀྱིས་བོད་གཞུང་ལ་ནང་མོལ་ཞུ་བཞིན་པ་དངབཅས་བསྟན་སྲུང་དང་བླངས་དམག་སྒར་གྱི་སྒྲིག་འཛུགས་དེ་ལྷོ་ཁ་ལྕགས་ཚ་གྲུ་གུ་ཐང་དུ་བོད་རྒྱལ་ལོ་ ༢༠༨༥ ཕྱི་ལོ་ ༡༩༥༨ ཟླ་ ༦ ཚེས་ ༡༦ ཉིན་དངོས་སུ་ཚུགས་པ་ཞིག་ཡིན་པ་དེ་ནི་དགོས་པ་རྒྱུ་མཚན་དུ་ཞུ་རྒྱུ་དང༌། སྒྲིག་འཛུགས་འདི་ཆབ་སྲིད་ཀྱི་ལྟ་བ་འདྲ་མིན་གྱི་ཚོགས་པ་ལྟ་བུ་དང༌། ཁྲིམ་སྲོལ་ཙམ་འཛིན་པའི་ཚོགས་པ་ལྟ་བུ་དེ་འདྲ་མིན་པ་བོད་ཀྱི་བྱང་ཤར་ཨ་མདོ་དང་རྒྱ་ནག་གི་ས་མཚམས་མདོ་ལ་རིང་མོའི་ཡན་ཆད་དང༌། བོད་ཀྱི་ཤར་ཕྱོགས་མདོ་སྟོད་དང༌། རྒྱ་ནག་གི་ས་མཚམས་སན་ཅིའི་མཆོད་རྟེན་དཀར་པོ་ཡན་ཆད་བོད་ཆོལ་ཁ་གསུམ་ཡོངས་སུ་རྫོགས་པའི་བོད་ལྗོངས་རྒྱལ་ཁབ་ཀྱི་བསྟན་པ་ཆབ་སྲིད་དང༌། རང་དབང་ཐོབ་ཐང་སྔར་ཡོད་རང་ལག་ཏུ་གཙང་མར་ལེན་ཕྱིར་ལུས་སྲོག་ལོངས་སྤྱོད་ཕ་མ་བུ་ཕྲུག་བཟའ་ཟླ་བཅས་བློས་ལིང་གིས་བཏང་སྟེ་བོད་རྒྱལ་ཁབ་དང་མི་རིགས་ཀྱི་རྩ་དོན་དུ་དམིགས་ཡུལ་ངེས་ཅན་ཞིག་དང་བཅས་སྙིང་སྟོབས་ཀྱི་རྣམ་པ་ལེགས་སྐྱེས་སུ་ཕུལ་བའི་ཚོགས་པ་ཞིག་ཡིན་པ་རེད།
བསྟན་སྲུང་དང་བླངས་དམག་གི་སྒྲིག་འཛུགས་ནས་རྒྱ་དམར་དམག་དཔུང་མང་ཉུང་དང༌། དམག་སྲིད་ཀྱི་སྦྱོང་བརྡར་ཡོད་མེད། གོ་ལག་རྫས་མདེལ་བཟང་ཞན་དང༌། མང་ཉུང་ཅི་རིགས་གི་ཐོག་འདོད་བློ་ཁེངས་པ་མ་བྱུང་རུང༌། གནམ་ས་གཉིས་ནས་དགྲ་བོའི་དྲག་མཚོན་ཆར་ལྟར་བབས་པའི་མི་རྟའི་རོ་ལམ་ནས་གྲོལ་ཐར་དཀའ་བ་དང༌། ཁྲག་གི་བབས་རྒྱུན་ནས་རྐང་རྗེས་སྤོ་ཡུལ་མེད་པའི་དགྲ་བོའི་འབར་རྫས་མཚོན་ཆའི་འོག་ནས་དཔའ་ངར་ཞུམ་མེད་བློ་སྟོབས་ཆེར་བསྐྱེད་ཀྱིས་བོད་གངས་ཅན་ཆོས་སྲིད་ཡོངས་ཀྱི་མངའ་བདག་ྋགོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་རྒྱལ་བསྟན་ཆབ་སྲིད་དང༌། སྐྱེ་འགྲོའི་འཕྲལ་ཡུན་གྱི་བདེ་དོན་བོད་ཀྱི་བསྟན་སྲིད་མི་རིགས་རང་དབང་བསྐྱར་གསོ་གནང་བ་སོགས་ཀྱི་སླད་དུ་རྒྱ་གར་འཕགས་པའི་ཡུལ་དུ་ྋཞབས་སོར་མངོན་པར་འཁོད་ཐུབ་པའི་ཆ་རྐྱེན་སྒྲུབ་བྱ་ལྷོད་མེད་ཀྱིས་ལམ་དཀྱིལ་བཀག་རྡོ་ལྟ་བུའི་རྒྱ་མིའི་དཔུང་དམག་རྣམས་ཕྱིར་འབུད་ལྷོ་ལམ་ནས་གཙང་སེལ་གྱིས་རྒྱལ་སྒོ་ཕྱེ་བ་ལྟ་བུའི་བྱེད་ཐུབ་པས་རང་རེས་མིག་འབུར་ཅེ་རེ་བལྟ་ཡུལ་གོང་སྐུའི་མཚན་དཔེའི་གྲིབ་བསིལ་གྱི་འོག་ནས་ཕེབས་རྗེས་སུ་བསྙེགས་པའི་རིས་མེད་ཀྱི་སྐྱེས་ཆེན་དམ་པ་རྣམས་དང༌། སེར་སྐྱ་རྒན་གཞོན་ཕོ་མོ་སྟོང་ཕྲག་མང་པོ་སྲོག་ཐར་བྱུང་བ་སོགས་རང་རེའི་རླབས་ཆེན་གྱི་སྒྲུབ་འབྲས་བཟང་པོ་ཞིག་ཡིན་པ་ཀུན་གསལ་དུ་གྱུར་ཡོད། དུས་དེ་ནས་བཟུང་ད་ལྟའི་བར་མི་ལོ་ ༢༦ རིང་དུ་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ནས་ཆོས་སྲིད་ལུགས་གཉིས་དམངས་གཚོའི་གཞུང་གི་སྒྲིག་འཛུགས་ཀྱིས་མཚོན་གང་ཅིའི་དབུ་འཁྲིད་ལམ་སྟོན་གནང་བའི་ཐུགས་རྗེའི་བཀའ་དྲིན་ལས་འཛམ་གླིང་ཡོངས་ལ་བོད་ཀྱི་ཆོས་སྲིད་རིག་གཞུང་དང་བཅས་པ་ཁྱབ་བརྡལ་དུ་གྱུར་པ་དང༌།
ལྷག་པར་དུ་ྋགོང་ས་མཆོག་ནི་འཛམ་གླིང་མི་མང་གི་དབུ་འཁྲིད་དམ་པ་ཞིག་དུ་ངོས་འཛིན་ཞུ་བའི་མཛད་འཕྲིན་ནི་བསམ་བརྗོད་ལས་འདས་ཤིང། དེ་དག་གི་བཀའ་དྲིན་ལས་བོད་མི་རྣམས་ཀྱི་དམིགས་ཡུལ་འདོད་དོན་རང་དབང་རང་བཙན་གྱི་ཉི་མ་འཆར་ལ་ཉེ་བའི་རེ་སྤོབས་བྱེད་ཆོག་པ་ཞིག་ཡིན། བོད་རྒྱལ་ཁབ་འདི་ནི་རྒྱལ་རབས་ལོ་རྒྱུས། མི་རིགས་གོམ་གཤིས། ཆོས་དང་རིག་གཞུང༌། ཆབ་སྲིད་ལམ་ལུགས་དང༌། དཔལ་འབྱོར་སོགས་གང་ས་ནས་རྩོད་དུ་མེད་པའི་ཁྲིམས་འགལ་བྱས་ཡོད་ཀྱང༌། ད་ཆ་ཀུན་དང་མཐུན་པའི་སྲིད་བྱུས་དང༌། དངོས་ཐོག་བདེན་འཚོལ་བྱེད་ཀྱི་ཡིན་ཟེར་བ་ལྟར་བོད་དོན་བདེན་པ་བདེན་ཐོག་ཏུ་བཞག་འོས་ལྟར་རྒྱ་དམར་གྱི་དབང་བྱུས་ཡོངས་རྫོགས་བོད་ནས་ཕྱིར་འཐེན་གྱིས་རྒྱ་རྒྱ་ཡུལ་དང༌། བོད་བོད་ཡུལ་དུ་གནས་དགོས་པ་དེ་ལྟར་ཡིན། གལ་སྲིད་དེ་ལྟར་མ་བྱུང་བར་ང་ཚོས་ཇི་སྲིད་དུ་བོད་རྒྱ་ཆེའི་མི་མང་ས་ཡ་དྲུག་གི་དགོས་འདུན་སྙིང་པོ་བོད་རང་དབང་རང་བཙན་གྱི་ཉི་མ་མ་ཤར་བར་དུ་དེ་སྲིད་སྐབས་ཀྱི་ལས་འགན་ཡང་དག་པ་ཞིག་བསྒྲུབ་དགོས། ྋགོང་ས་ྋསྐྱབས་མགོན་ྋརྒྱལ་བའི་དབང་པོ་མཆོག་གི་ཇི་ལྟར་བཀའ་སློབ་གནང་བ་དེ་ལྟར་སྙིང་དབུས་སུ་བཅང་དགོས་པ་དང༌། གཞིས་བྱེས་བོད་མི་ས་ཡ་དྲུག་གི་བདེ་དོན་ལ་ཁ་ཙམ་མ་ཡིན་པར་ཆོལ་གསུམ་མི་མང་ཡོངས་རྫོགས་དམ་ཚིག་ཟངས་ཁ་གཅིག་སྒྲིལ་གྱི་ནུས་ཤུགས་སྒྲིལ་རྒྱུའི་སླར་ཡང་ཉི་མ་གསར་པ་ཞིག་ཤར་ཡོད་པའི་ཐོག་སྲ་བརྟན་འགྱུར་བ་མེད་པ་བྱེད་རྒྱུ་གལ་ཆེའི་ནང་གི་གལ་ཆེ་རེད།
བར་སྐབས་དུས་ཀྱི་འགྱུར་འགྲོས་ལ་བརྟེན་ནས་བོད་ཕྱི་ནང་བལྟ་སྐོར་དང༌། གཉེན་འཕྲད་དུ་འགྲོ་འོང་ཇི་སྙེད་ཅིག་མཆིས་རུང༌། རྒྱ་མིའི་ཕྱོགས་ཀྱི་དམིགས་ཡུལ་ནི་ྋགོང་ས་ྋསྐྱབས་མགོན་ཆེན་པོ་མཆོག་དབུས་ཕྱི་རྒྱལ་ལ་ཡོད་པའི་བོད་མི་རྣམས་བློ་འགུག་ཐབས་སུ་མགོ་བསྐོར་གྱི་ཆེད་དུ་རང་དབང་ཡོད་ཁུལ་བྱས་ཞིག་ལས་དོན་དངོས་བར་ལམ་རྒྱ་དམར་ནས་ྋགོང་ས་ྋསྐྱབས་མགོན་ཆེན་པོ་མཆོག་ཕྱིར་ལོག་གནང་རྒྱུའི་ཆ་རྐྱེན་ཡིན་ཅེས་དོན་ཚན་ལྔ་འཁོད་པའི་བརྗོད་ཚིག་དོན་གནད་ཐོག་ནས་གསལ་པོ་ཤེས་ཐུབ། གང་ལགས་ཟེར་ན་ ༡༩༥༩ ལོར་རྒྱ་མིས་བྱུས་ངན་གྱིས་ྋགོང་ས་ཆེན་པོ་པེ་ཅིང་དུ་གདན་ཞུ་བཟང་བཙོན་ལྟར་ཉར་རྒྱུའི་སྲིད་བྱུས་དམིགས་ཡུལ་དེ་བཞིན་ད་དུང་མི་ལོ་ ༢༦ གི་རྗེས་སུའང་འགྱུར་བ་ཕྱིན་མེད་པ་དེ་ལྟར་གསལ་པོ་བསྟན་པ་རེད། དེར་བརྟེན་བོད་མི་རིགས་ཡོངས་ནས་ངོ་རྒོལ་མཐའ་གཅིག་ཏུ་བྱ་རྒྱུར་འགྱུར་བ་མེད།
བོད་རྒྱལ་ཁབ་ཀྱི་མི་རིགས་དང་བཅས་པའི་དོན་དུ་ཆོལ་གསུམ་བོད་མི་དཔའ་བོ་ཕོ་མོ་སྐུ་གཤེགས་རྣམས་ཀྱི་ཐུགས་དགོངས་ཡོངས་སུ་རྫོགས་པའི་ཆེད་དུ་ང་ཚོས་དྲན་གསོ་བྱེད་པ་དང་ཆབས་ཅིག་དམིགས་ཡུལ་དང་དགོས་དོན་རྣམས་སྙིང་དབུས་སུ་བཅངས་ནས་བཙན་རྒྱལ་གུང་ཁྲན་རིང་ལུགས་ལ་ངོ་རྒོལ་མཐར་ཕྱིན་པ་བྱེད་རྒྱུ་དེ་སེམས་ཀྱི་དམ་བཅའ་བརྟན་པོ་བྱ་དགོས་པ་དེ་ཡིན།
མཐའ་དོན་ཞུ་རྒྱུའི་སྙིང་པོ་ྋགོང་ས་ྋསྐྱབས་མགོན་ྋརྒྱལ་བའི་དབང་པོ་མཆོག་སྐུ་ཚེ་ཡུན་ནས་ཡུན་དུ་བརྟན་པ་དང༌། ཐུགས་ཀྱི་བཞེད་དགོངས་འབད་མེད་དུ་འགྲུབ་པའི་སྨོན་ལམ་ཞུ་རྒྱུ་དང༌།
བོད་ཆོལ་ཁ་གསུམ་གྱི་མི་མང་རྣམས་མཛའ་བརྩེའི་མཐུན་ལམ་འགྱུར་མེད་ཁྲི་ལོ་བརྟན་པར་ཤོག
བཙན་བྱོལ་བོད་མིའི་ཁྱིམ་ཚང་གཉིས་པ་རྒྱ་གར་གཞུང་དང་མི་མང་གི་བཀྲིན་དྲན་གསོ་དང་འབྲེལ་ཐུགས་རྗེ་ཆེ་ཞུའི་ཐོག་འཕགས་བོད་མཛའ་བརྩེའི་མཐུན་ལམ་ཁྲི་ལོར་བརྟན་པར་ཤོག་ཅེས། བཀྲིས་བདེ་ལེགས་དང་བཅས་མདོ་ཁམས་ཆུ་སྒང་དབུས་རྒྱུན་ལས་ཡིག་ཚང་ནས་ ༡༩༨༥ ཕྱི་ཟླ་ ༦ ཚེས་ ༡༦ ལ།།

དེ་ལས་མང༌།: ཕྱི་ལོ་ ༡༩༨༥ ནས་ ༢༠༠༣ བར་གྱི་མདོ་ཁམས་ཆུ་སྒང་དབུས་སྤྱི་ཁྱབ་རྒྱུན་ལས་ཁང་ནས་ཡོངས་ཁྱབ་བསྩལ་གནང་བའི་གསུང་འཕྲིན་ཁག་བཞུགས་སོ།།

བོད་ཀྱི་བསྟན་སྲུང་དང་བླངས་མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ ཧྲིལ་པོ་ ༥༢ འཁོར་བའི་དུས་དྲན་ཐོག་ཡོངས་ཁྱབ་གཏམ་བཤད།

མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ཧྲིལ་པོ་ ༥༢ འཁོར་བའི་དུས་དྲན་མཛད་སྒོའི་ཐོག་ཆེད་ཕེབས་གནང་བའི་བླ་སྤྲུལ་དགེ་འདུན་གྱི་སྡེ་རྣམས་དང་སྐུ་མགྲོན་གཙོ་བོ་་་་་་་་་་་་མཆོག    ས་གནས་འཐུས་ཚོགས་ཀྱི་ཚོགས་གཙོ། ས་གནས་འགོ་འཛིན། ས་གནས་རང་བདེན་ཚོགས་གཙོ། གཞན་ཡང་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ་རྣམ་པ་བཅས་སེར་སྐྱ་མི་མང་ཡོངས་ལ་ངས་མདོ་སྟོད་རྒྱ་ཆེའི་མང་ཚོགས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
༡༽བོད་རྒྱལ་ལོ་ ༢༡༣༧ ཟླ་ ༥ པའི་ཚེས་ ༤ དང་ཕྱི་ལོ་ ༢༠༡༠ ཟླ ༦ ཚེས་ ༡༦ གི་ཉིན་མོ་འདི་བཞིན་ལྷོ་ཁ་ལྕགས་ཚ་གྲི་གུ་ཐང་དུ་དཔའ་བོ་ཨ་འབྲུག་མགོན་པོ་བཀྲ་ཤིས་ཀྱིས་དབུ་ཁྲིད་པའི་བོད་ཀྱི་བསྟན་སྲུང་དང་བླངས་དམག་མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ཧྲིལ་པོ་ ༥༢ འཁོར་བའི་དུས་ཚིགས་སུ་ཁེལ་བ་ལྟར། རྒྱ་དམར་གྱི་ཟ་སེམས་འདོད་རྔམས་ཁོ་ནས་རྩ་ཆེའི་བོད་ཀྱི་ཆོས་དང་རིག་གཞུང་དང་། བོད་མིར་ཇི་མི་སྙམ་པར་དེང་དུས་ཀྱི་འཕྲུལ་མཚོན་ལ་སོགས་པའི་དྲག་སྤྱོད་ཁོ་ནར་བརྟེན་ཏེ་བཙན་འཛུལ་བྱས་པར་བོད་རྒྱལ་ཁབ་དང་། བསྟན་སྲིད་སྲུང་སྐྱོབ་བྱ་རྒྱུར་ཚེ་ལུས་ལོངས་སྤྱོད་ཡོངས་རྫོགས་ཁ་ཙམ་མིན་པ་དོན་ངོ་མའི་བློས་བཏང་གནང་བའི་འདས་པའི་རྒྱལ་གཅེས་དཔའ་བོ་དཔའ་མོ་རྣམས་དང་། ད་ལྟ་འཚོ་ཞིང་བཞུགས་པའི་བསྟན་སྲུང་དང་བླངས་དམག་ཟུར་རྣམ་པའི་བཀའ་དྲིན་དང་བྱས་རྗེས་བླ་ན་མེད་པ་བཞག་གནང་མཛད་པ་དེ་དག་བྱས་པ་རྗེས་མེད་དུ་མ་སོང་བ་ང་ཚོ་ཤུལ་ལུས་བོད་མི་ཚོས་ལོ་བསྟར་ཆགས་སུ་དེ་དག་དྲན་གསོ་ཞུ་རྒྱུའི་དུས་ཚིགས་ངེས་ཅན་ཞིག་ཏུ་སླེབས་པ་ཡིན།
༢༽དེང་རབས་གཞོན་སྐྱེས་འཚར་ལངས་འབྱུང་བཞིན་པའི་བུ་རབས་ཚ་རྒྱུད་རྣམས་ལ་འདས་པའི་ཕ་མེས་ཚོའི་སེམས་ཤུགས་དང་དམིགས་ཡུལ་ངོ་མ་ཇི་ཡིན་ཁ བཤད་ཙམ་མིན་པ་རྒྱུད་ལ་འཇགས་ཐུབ་པའི་ངོ་སྤྲོད་གནང་རྒྱུ་ནི་ང་ཚོའི་མི་རབས་དང་འགོ་ཁྲིད་ཚོའི་འོས་འགན་དོར་མི་རུང་བ་ཞིག་དང་། བོད་མི་མང་པོ་མི་ཤི་ཁྱིམ་སྟོང་དང་འཛམ་གླིང་གང་སར་འཁྱམས་པོ་ལྟ་བུར་གནས་དགོས་པའི་རྒྱུ་རྐྱེན་སུ་ལ་ཐུག་ཡོད་པ་ངོས་འཛིན་གསལ་པོ་བྱས་ཏེ་མ་འོངས་བོད་རང་བཙན་གཙང་མ་ཞིག་མ་བྱུང་བར་བོད་མིའི་སེམས་ཤུགས་དང་། ལྷག་བསམ་གཡོ་བ་མེད་པར་རྒྱུན་གནས་ཐུབ་པའི་ལོ་རྒྱུས་ཀྱི་སློབ་གསོའི་དུས་རིམ་ཞིག་དང་མི་རབས་རྗེས་མར་རྒྱུད་སྤྲོད་བྱ་རྒྱུའི་དུས་ཚིགས་ཤིག་ལ་ངོས་འཛིན་ཞུ་ཆོག་པ་ཡིན།  

དེ་ལས་མང༌།: བོད་ཀྱི་བསྟན་སྲུང་དང་བླངས་མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ ཧྲིལ་པོ་ ༥༢ འཁོར་བའི་དུས་དྲན་ཐོག་ཡོངས་ཁྱབ་གཏམ་བཤད།

གསུང་འཕྲིན་ཁག

ལྔ་བཅུའི་མཇུག་སྡོམ་མཛད་སྒོར་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་ནས་བསྩལ་བའི་ཡོངས་ཁྱབ་གསུང་འཕྲིན།

དེ་རིང་འདིར་མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ཧྲིལ་པོ་ ༥༡ འཁོར་བ་དང༌། མི་ལོ་ཧྲིལ་པོ་ ༥༠ འཁོར་བའི་མཇུག་བསྡོམས་མཛད་སྒོའི་ཐོག་ཕེབས་པའི་སྐུ་མགྲོན་གཙོ་བོ་ཆེས་མཐོའི་ཁྲིམས་ཞིབ་ཆེ་བ་ཟུར་པ་བྱ་དུར་བསོད་ནམས་བཟང་པོ་མཆོག་དང༌། སྐྱབས་གནས་བླ་སྤྲུལ་དགེ་འདུན་གྱི་སྡེ། བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ། བོད་མི་མང་སྤྱི་འཐུས་ཚོགས་ཟུར་ཀརྨ་ཆོས་འཕེལ་མཆོག ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་སྤྱི་འཐུས་རྒྱུན་ལས་རྣམ་པ། མདོ་སྟོད་སྤྱི་འཐུས་རྣམ་པ། ལྡི་ལི་བོད་སྒར་བསམ་ཡས་གླིང་གི་ས་གནས་འགོ་འཛིན། གཞུང་འབྲེལ་སྡེ་ཚན་ཁག་གི་དབུ་འཛིན་རྣམ་པ། མདོ་ཁམས་ཆུ་བཞི་སྒང་དྲུག་གི་དབུས་རྒྱུན་ཟུར་རྣམ་པ། དེ་བཞིན་སྤྱི་མི་དང་བརྒྱ་དཔོན། གཞུང་འབྲེལ་མ་ཡིན་པའི་ཚོགས་པ་ཁག་གི་དབུ་ལས་རྣམ་པ། བསྟན་སྲུང་དང་བླངས་དམག་ཟུར་རྣམ་པ། མདོ་ཁམས་ཆུ་སྒང་ས་གནས་ཁག་གི་དབུ་ཁྲིད་རྣམ་པའི་གཙོས་སེར་སྐྱ་མང་ཚོགས་ཡོངས་ལ་ངས་མདོ་སྟོད་རྒྱ་ཆེའི་མང་ཚོགས་ཡོངས་ཀྱི་ཚབ་ཞུས་ཏེ་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན།

བོད་ས་མོ་གླང་ལོ་དང་ཕྱི་ལོ་ ༢༠༠༩ ལོའི་ཟླ་ ༦ ཚེས་ ༡༦ ཉིན་མོ་འདི་ནི་ལྷོ་ཁ་ལྕགས་ཚ་གྲི་གུ་ཐང་དུ་མདོ་ཁམས་ཆུ་བཞི་སྒང་དྲུག་བསྟན་བསྲུང་དང་བླངས་དམག་དབུ་བརྙེས་ནས་མི་ལོ་ཧྲིལ་པོ་ ༥༡ འཁོར་བའི་དུས་ཚིགས་ཁྱད་པ་ཅན་ཞིག་དང༌། མི་ལོ་ཧྲིལ་པོ་ ༥༠ འཁོར་བའི་མཛད་སྒོའི་ཉིན་མཐའ་མ་དེ་ཡིན། དུས་དྲན་མཛད་སྒོ་འདི་བཞིན་ལོ་བསྟར་ཆགས་སུ་བསྲུང་བརྩི་ཞུ་བཞིན་པ་དགའ་སྐྱིད་ལོ་ལེགས་དང་སྐྱིད་པོ་རྒྱག་པ། ཕྱི་ནང་མི་མང་གི་མདུན་དུ་འདྲ་ཆགས་མཛེས་ལྡན་གྱི་ཆེད་དུ་མ་ཡིན་པ་རྒྱ་དམར་གྱིས་ཕྱི་ལོ་ ༡༩༤༩ ལོར་བོད་ཤར་རྒྱུད་ནས་རིམ་བཞིན་བཙན་འཛུལ་བྱས་ཏེ་རང་ས་སྟོད་སྨད་བར་གསུམ་དང༌། བོད་ཀྱི་རྒྱལ་ས་ལྷ་སའི་ཁུལ་དུ་དྲག་པོ་མཚོན་ཆའི་དུག་རླུང་གི་མུན་པ་འཁྲིགས་ཉེར་མཚམས་དཔའ་བོའི་ཁྱུ་ཆོག་ཨ་འབྲུག་མགོན་པོ་བཀྲིས་ཀྱི་གཙོས་མདོ་ཁམས་དཔའ་བོ་མང་པོས་མ་གྲོས་བསམ་པ་གཅིག་མཐུན་གྱིས་བོད་བསྟན་སྲིད་སྲུང་སྐྱོབས་ཁོ་ནའི་ཆེད་དུ་ཕྱི་ལོ་ ༡༩༥༨ ལོའི་ཟླ་ ༦ ཚེས་ ༡༦ ཉིན་རང་སྲོག་བློས་བཏང་གི་མནའ་གན་ཆེན་མོ་བཞག་པ་ལྟར་ལྷོ་ཁ་ལྕགས་ཚ་གྲི་གུར་དཔོན་དམག་ཕོན་ཆེ་འདུ་འཛོམས་ཐོག་དམག་སྒར་དབུ་འཛུགས་མཛད་སྒོ་ཟབ་རྒྱས་ཐོག་དམག་དར་རལ་གྲི་ཁ་སྤྲོད་མཁའ་དབྱིངས་སུ་སྒྲེངས་ཏེ་བོད་རང་དབང་རང་བཙན་མ་ཐོབ་བར་དགྲ་རྒོལ་བྱ་རྒྱུར་ཕྱི་འཐེན་ནམ་ཡང་མི་བྱེད་པའི་དམ་བཅའ་བརྟན་པོ་ཡོད་པ་ལྟར་རང་སྲོག་འབན་དུ་བཞག་སྟེ་བོད་བསྟན་སྲིད་ཀྱི་ཆེད་དུ་དགྲ་བོ་རྒྱ་དམར་ལ་གདོང་ལེན་མཐའ་གཅིག་ཏུ་བྱས་པའི་ཉེར་འབྲས་སུ་མི་ཤི་རྒྱུ་གྱོང་བསམ་ལས་འདས་པ་བྱུང་བ་ནི་ཚེ་སྔོན་ལས་ལ་གཟུར་ཐབས་མེད་པ་ཞིག་ཡིན། རྒྱ་མི་དམར་པོས་དྲག་སྤྱོད་ངན་པའི་འོག་བོད་མིའི་ཚེ་སྲོག་ནི་བརྡོག་ཞབས་ཀྱི་འབུ་གྲོག་མའི་མཐོང་ཙམ་མ་བཞག་པར་གནམ་ས་མགོ་གཏིང་ལྷོག་ཐུབ་པའི་དེང་དུས་ཀྱི་འཕྲུལ་རིགས་མཚོན་ཆ་ཁོ་ནའི་འོག་བོད་མི་ཉེས་མེད་རྣམས་རང་ཡུལ་རང་སར་སྡོད་ཐབས་མེད་པའི་སྡུག་སྦྱོང་མནར་གཅོད་བསད་གཏུབ་དང༌། བསྟན་དགོན་བླ་སྤྲུལ་སོགས་རིམ་བཞིན་རྩ་མེད་བཏང་བའི་ལས་འགུལ་བརྩམས་པ་འཇིག་རྟེན་གྱི་མི་སྤྱོད་ལས་འདས་པ་མ་རབས་ཐ་ཤལ་གྱི་བྱ་སྤྱོད་ངན་པ་དེ་དག་མདོ་ཁམས་ཆུ་བཞི་སྒང་དྲུག་གི་མི་མང་གིས་སྡུག་སྒོམ་བཟོད་ཐབས་མ་བྱུང་བར་དམིགས་ཡུལ་ངེས་ཅན་ཞིག་བཟུང་སྟེ་བསྟན་སྲིད་ཀྱི་ཆེད་དུ་ཚོགས་པ་འདི་དབུ་འཛུགས་ཞུས་པ་ཞིག་ཡིན་ཙམ་ང་ཚོ་མདོ་ཁམས་མི་མང་གིས་འདས་པའི་རྒྱལ་གཅེས་དཔའ་བོ་དཔའ་མོའི་མཛད་རྗེས་ལ་གུས་བརྩིས་ཆེན་པོས་དྲན་གསོ་དང༌། ཤི་གསོན་མང་པོའི་བོད་བསྟན་སྲིད་ཀྱི་ཆེད་དུ་རང་སྲོག་བློས་བཏང་གི་དགྲ་རྒོལ་བྱས་རིགས་བྱས་པ་རྗེས་མེད་དུ་མི་ཡོང་བའི་འགན་ཁུར་གྱིས་བསྲུང་བརྩི་ཞུས་པ་ལས་ལྟ་བ་འདྲ་མིན་དང༌། སྤྱི་ལ་མ་ཁྱབ་པའི་ཁེ་ཕན་འདྲ་མིན་གྱི་ཆེད་དུ་བཙུགས་པའི་ཚོགས་པ་དང༌། ལུང་ཚན་དང་ཆོལ་ཁའི་རྐུབ་སྟེགས་འཚོལ་ཡུལ་དང༌། ལྟོ་གོས་འཚོལ་ཆེད་དུ་བཙུགས་པ་ཞིག་མིན་པ་ས་རིས་ཐང་གསལ་ཡིན། འོན་ཀྱང་ད་བར་རླབས་ཆེན་གྱི་བྱས་རྗེས་དང་གྲུབ་འབྲས་གཟེངས་སུ་ཐོན་པ་ཚོགས་སྐྱིད་སུས་ཀྱང་དོ་ཟླ་བྲལ་བ་མ་ཟད། ཞི་བའི་ཐབས་ལམ་བརྒྱུད་ལམ་གཞུང་དུ་སྐད་འབོད་བྱས་པ་ལྟ་བུ་མ་ཡིན་པའི་ལས་འགུལ་ནུས་ཅན་འཛམ་གླིང་དུ་གྲགས་རྒྱུ་ཡོད་པ་དེ་འདྲ་སྤེལ་བའི་རྒྱུ་རྐྱེན་ལ་བརྟེན་རང་རིགས་ལ་ཤ་ཞེན་དང༌། བོད་དོན་ལ་སེམས་གཏིང་ནས་ཤ་ཚ་ཡོད་པའི་ཕྱི་ནང་གི་སྐྱེ་བོ་མང་པོས་བསྔགས་བརྗོད་ཀྱི་མེ་ཏོག་གོ་ལའི་ཁྱོན་དུ་བཀྲམས་ཡོད། དེ་བཞིན་ཕྱི་ནང་སྐྱེ་བོ་ཐ་ཤལ་མང་པོས་མི་རྒྱུ་གཉིས་ཀ་བསྟན་སྲིད་ཀྱི་ཆེད་དུ་འགྲོ་གྲོན་བཏང་ཟིན་པའི་ཚོགས་པ་འདིས་བྱས་པ་རྗེས་མེད་དུ་འགྲོ་རྒྱུའི་བསམ་ངན་འཆང་བཞིན་པའི་བོད་མི་དཀྲུགས་རིས་ཅན་གང་ན་སུ་ཡོད་ལ་ང་ཚོ་ཕྱི་རབས་རྗེས་འཇུག་གཞོན་ནུ་ཕོ་མོ་ཚོས་དུས་ནམ་ཡང་ཁོ་ཚོས་རེ་སེམས་ངན་པ་འགྲུབ་མི་ཐུབ་པ་བྱ་རྒྱུ་ནི་ཡིད་ཡུལ་དུ་འཇོག་དགོས་པ་ཞིག་ཡིན། 

དེ་ལས་མང༌།: གསུང་འཕྲིན་ཁག

མདོ་ཁམས་ཆུ་བཞི་སྒང་དྲུག་བསྟན་སྲུང་དངས་བླངས་དམག་གི་བསྒྲིགས་འཛུགས་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་ཐོག་ཡོངས་ཁྱབ་གཏམ་བཤད།

བོད་རྒྱལ་ལོ་ ༢༡༣༥ ཕྱི་ལོ་༢༠༠༨ ལོའི་ཟླ་ ༦ ཚེས་ ༡༦ གི་ཉིན་མོའི་འདི་མདོ་ཁམས་ཆུ་བཞི་སྒང་དྲུག་བསྟན་སྲུང་དངས་བླངས་དམག་གི་སྒྲིགས་འཛུགས་གསར་དུ་བཙུགས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་ཁྱད་པར་ཅན་འདིའི་ཐོག་ཆེད་ཕེབས་གནང་བའི་སྐུ་མགྲོན་གཙོ་བོ་དཔལ་ལྡན་བོད་མི་མང་སྤྱི་མཐུས་ཚོགས་གཙོ་མཆོག་གི་བཀུར་འོས་སྤྱི་འཐུས་རྣམ་པ། བཙན་བྱོལ་བོད་བཞུང་ཆེས་མཐོའི་ཁྲིམས་དཔོན་རྣམ་པ། དཔལ་ལྡན་བཀའ་བློན་རྣམ་པ། དཔལ་ལྡན་བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ་མཆོག་གི་གཙོས་བཀའ་ཟུར་རྣམ་པ། བཙན་བྱོལ་བོད་གཞུང་གི་དྲུང་ཆེ་རྣམ་པ། བྱས་རྗེས་ཅན་གྱི་བསྟན་སྲུང་དྭངས་བླངས་དམག་ཟུར་རྣམ་པ། ས་གནས་འཐུས་མི་ཚོགས་གཙོ། ས་གནས་འགོ་འཛིན། ས་གནས་རང་བདེན་ཚོགས་གཙོ། གཞུང་འབྲེལ་མ་ཡིན་པའི་ཚོགས་པ་ཁག་གི་དབུ་འཛིན་རྣམ་པ། མདོ་ཁམས་ཆུ་སྒང་དབུས་རྒྱུན་ཟུར་རྣམ་པ་ལྷན་རྒྱས། གཞན་ཡང་འབྲེལ་ཡོད་རྒྱ་ཆེའི་སེར་སྐྱ་མང་ཚོགས་ཡོངས་ལ་མདོ་ཁམས་མི་མང་ཡོངས་ཀྱི་ཚབ་ཞུས་ཏེ་གུས་བརྩིས་ཆེན་པོའི་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན།

དེ་ལས་མང༌།: མདོ་ཁམས་ཆུ་བཞི་སྒང་དྲུག་བསྟན་སྲུང་དངས་བླངས་དམག་གི་བསྒྲིགས་འཛུགས་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་ཐོག་ཡོངས་ཁྱབ་གཏམ་བཤད།