Poetry
ང་འདི་འདྲ་ཞིག་ལ་འཚོ་བར་འདོད།
ད་ནས་བཟུང་ཁྱེད་རང་དོན་སྙིང་ལྡན་པའི་མི་ཚེ་ཞིག་བསྐྱལ་རོགས་འདི་ནི་བདག་དང་གྱེས་ཁར་ཁོ་མོས་བཤད་པའི་རེ་སྨོན་དེ་རེད།
ལོ་ཟླའི་ཕྲེང་བ་བགྲངས་པའི་འཁོར་ཁུག་ན། །
དཔྱིད་གསུམ་ཀུན་བདེའི་དགེ་སྒྲུབ་མ་མཆིས་ཀྱང༌། །
མགོ་ནག་མི་ཡིས་བསྐྲུན་པའི་གྲོང་ཁྱེར་ན། །
རིག་འཚོ་ཟིན་པའི་མི་ཞིག་བྱེད་པར་འདོད། །
ཀ་དག་གནས་ལུགས་རྟོགས་པའྀ་རྣལ་འབྱོར་མིན། །
ཁ་བཤད་དོན་ལ་གནས་ཙམ་གྲྭ་རྐྱང་ཡིན། །
ག་བྱེད་ཅི་བྱེད་མི་ཤེས་བླུན་རྒན་མིན། །
ང་རང་མདུན་རྒྱབ་ཤེས་པའི་མི་སྤྱང་ཡིན། །
ཅ་རཻར་མཐོང་ཚད་གྲོགས་པོ་བཟོ་མཁན་མིན། །
ཆ་རྒྱུས་ཅན་ལ་རྟག་ཏུ་མཐུན་མཁན་ཡིན། །
ཇ་ཟས་རིག་ཚད་ཁ་ལ་བརྫོང་མཁན་མིན། །
ཉ་ར་བདག་གཉེར་རང་ལུས་བསྲུང་ཤེས་ཡིན། །
ཏ་ཀུ་གང་ཐོབ་ཉར་བའི་དཀོར་བདག་མིན། །
ཐ་ཐོར་འཚོ་བས་འདོད་བློ་ཁེངས་ཙམ་ཡིན། །
ད་ལོ་མཐུན་ནས་སང་ལོར་འགྲས་མཁན་མིན། །
ན་མཉམ་གྲོགས་ལ་མཛའ་བརྩེ་རྒྱུན་སྲིང་ཡིན། །
པཱ་ལགས་པཱ་ལགས་ཚང་མར་བརྗོད་མཁན་མིན། །
ཕ་མ་དངོས་ཀྱི་དྲིན་ལན་དྲན་ཤེས་ཡིན། །
བ་ལང་ལས་ཞན་སྤྱོད་ལོག་འཁྲབ་མཁན་མིན། །
མ་འདོད་རང་སར་འཇོག་པའི་བཏང་སྙོམས་ཡིན། །
འཆར་སྒོ་མགྱོགས་རིས་མ།
བྱང་རྒྱུད་གངས་རི་ཤར་མཐའི་ཉི་མས་བཞུས།།
མེས་པོའི་རྣམ་ཤེས་མེ་མདའི་ཁ་ནས་ཡལ།།
མཛེས་མའི་ལང་ཚོ་ལོ་ཟླའི་དམག་གིས་བཀུམས།།
གྱང་རོ་འབུར་དུ་ཐོན་པའི་ཁང་ཤུལ་དང༌།།
མིང་གི་ལྷག་མར་ལུས་པ་རྒྱལ་པོའི་མཚན།།
མི་རྟག་བཙན་པོའི་དཔུང་གིས་འཇོམས་པ་ཡི།།
འདུས་བྱའི་སྒྱུ་མའི་འཇའ་རིས་ཡལ་བ་མང༌།།
གངས་སུལ་དུ་བཞག་པའི་རྐང་རྗེས་དམར་པོ།
ཉིན་བྱེད་དམར་པོ་ནུབ་རིར་ཡོལ་དུས་མུན་པའི་རུ་མཚོན་མཁའ་ལ་གཡོ།།
གངས་དང་རྫ་སུལ་ཆུ་རླུང་འགྲམ་ན་མེས་པོའི་ལ་རྒྱ་རྩོད་པ་ཡིས།།
ཚེ་སྲོག་དམར་པོ་མཁའ་ལ་ཐིམ་པའི་སྔོན་གཤེགས་དཔའ་བོ་ཁྱུ་གཅིག་གིས།།
ཐུན་གསུམ་མཚན་མོའི་སྨག་རུམ་ཀློང་ནས་ཟླ་བའི་འོད་ལ་རེ་སྒུག་བྱེད།།
ས་མཐའི་ཁང་ཆུང་ཧྲུལ་པོའི་ནང་དུ་གསལ་མ་གསལ་གྱི་གློག་སྒྲོན་འོག
སྔོན་གཤེགས་དཔའ་བོའི་རྣམ་ཤེས་ཞུགས་པའི་ལོ་རྒྱུས་དམར་པོའི་སྙན་ངག་ཀློག
མདོ་ཁམས་ཀོང་ཡུལ་ལྟེ་ཁྲག་འཕོས་པའི་མེས་པོ་གཉའ་ཁྲི་བཙན་པོ་ཡི།།
ཞབས་སྐྱེས་རྡུལ་རྗེས་ཐད་ཀར་བསྙེཊ་པའི་མདོ་ཁམས་དཔའ་བོའི་སྙིང་སྟོབས་གསལ།།
