ལ་དྭགས་ས་གནས་མདོ་ཁམས་ཆུ་བཞི་སྒང་དྲུག་གི་རྒྱུན་ལས།

 ཕྱི་ལོ་ ༢༠༠༨ ཟླ་ ༨ ཚེས་ ༡༦ ནས་ས་གནས་ཆུ་སྒང་རྒྱུན་ལས་གཤམ་གསལ་རྣམས་ལ་འོས་ཐོབ་བྱུང་ནས་ལས་འགན་ཆ་དགོས་བྱས་པ་གཤམ་གསལ་ལྟར་ཡིན།
ཁྱུང་པོ་བོན་རྒྱུད་ཁྱུང་གྲགས། ཚོགས་གཙོ།

རྒྱས་ཤོད་སྟག་ལྷ་དབང་རྒྱལ། ཚོགས་གཞོན།

ནང་ཆེན་འབྲོང་སྟོད་དགྲ་འདུལ། དྲུང་ཆེ།

ནང་ཆེན་འབྲོང་སྨད་བསོད་ནམས་མཐུ་སྟོབས། ཟུང་དྲུང༌།

འབའ་པ་བློ་བཟང་ཕུན་ཚོགས། རྩིས་པ།

ནང་ཆེན་འབྲོང་སྟོད་ཀརྨ་ཚེ་རིང་ཕུན་ཚོགས། དངུལ་གཉེར།

སྒ་པ་ཐུབ་བསྟན་བསྟན་འཛིན། དོ་གཉེར།

བཅས་ད་ཡོད་ས་རྒྱུན་གི་ལས་ཁུར་ཞུ་བཞིན་ཡོད་པས་ས་གནས་ཆུ་སྒང་རྒྱུན་ལས་ཁང་ནས་ ཕྱི་ལོ་ ༢༠༠༩ ཟླ་ ༢ ཚེས་ ༢ ལ་ཕུལ།

ཕ་ཡུལ་རོང་པོ་སྟོད་ནས་ཡིན་པའི་ག་བ་ཐུབ་བསྟན་བསྟན་འཛིན་རང་ཉིད་ར་རྟགས་དགོན་པར་གྲྭ་བཙུན་བྱེད་བཞིན་པའི་སྐབས་སུ་ཕྱི་ལོ་ ༡༩༥༨ ཟླ་ ༦ ཚེས་ ༡༠ ཉིན་རྒྱ་དམག་ལ་ངོ་རྒོལ་བྱེད་པའི་ལས་འགུལ་ནང་དུ་དང་བླངས་བླང་ཚུལ་དུ་ཞུགས། སྐབས་དེར་ང་རང་ལོ་ན་ཉི་ཤུ་ཙམ་ཡིན་ལ་དམག་འཐབ་སྐབས་སུ་རྒྱ་དམག་དཔུང་ཤུགས་ཆེ་བས་ང་ཚོ་ཕམ་དུ་བཅུག་སོང༌། དེ་སྐབས་ང་རང་གི་ཕ་མ་སྤུན་མཆེད་ཚང་མ་རྒྱ་མིའི་ལག་ཏུ་ཤོར་སོང་བས། ང་རང་ལྷ་སར་ ༡༩༥༨ ༡༢ ༡༨ ཉིན་སོང་ནས་དེ་གར་ཟླ་བ་གཉིས་རིང་བསྡད། སྐབས་དེར་ཕྱི་ལོ་ ༡༩༥༩ ༢ ༡༠ ཉིན་ཏེ་ལྷ་སར་དམག་འཁྲུག་ལོང་སོང་བས་གུས་རང་ཉིད་ཀྱང་དམག་འཐབ་ནང་དུ་འཛུལ་ཞུགས་བྱས། ར་མོ་ཆེ་དང་ཇོ་ཁང༌། དེ་མིན་ཁ་རགས་ཤག་སོགས་སུ་དམག་སྐབས་སུ་རང་ཉིད་རྒྱ་ལག་ཏུ་ཚུད་ནས་ནོར་བུ་གླིང་ཁར་ཟླ་བ་གཅིག་རིང་བཙོན་དུ་བཅུག་སོང༌། དེ་རྗེས་རྒྱ་དམར་གྱིས་ཕྲན་རང་ཉིད་ཆེན་ཁྲོན་གློག་ཁང་བཟོ་བར་ལས་ཀ་བྱེད་པར་ཁྲིད་སོང༌། ཁོ་བོ་རང་ཉིད་གློག་ཁང་དེར་ལས་ཀ་བྱས་རིང་རྒྱ་མིའི་སྡུག་བཙུབ་འོག་ནད་པ་བཟོས་ཏེ་སྟོད་རྒྱབ་སོགས་སུ་ན་ཟུག་དང་མགོའི་སྐྲ་ཡང་བུད་འགྲོ་བ་ཞིག་བཟོས་སོང༌། ད་དུང་བཙོན་དུ་ཟ་བཏུང་རིགས་ཤིན་ཏུ་སྐྱོ་བས་དཀའ་ངལ་བཟོད་གླག་མེད་པ་དེ་འདྲ་འཕྲད་མྱངས། དེ་ནས་ཁོ་བོ་རང་ཉིད་འུ་ཐུག་སྟེ་ཐབས་ཤེས་བརྩལ་ནས་ཕྱི་ཟླ་ ༡༡ ནང་བཙོན་ཁང་ནས་བྲོས་པ་ཡིན། དེ་ནས་བྱང་ཕྱོགས་སུ་བྲོས་པས་ར་སྒྲེང་དགོན་པར་འབྱོར་སོང༌། དེའི་རྗེས་ང་རང་སུ་རུ་རུ་དུས་འབྱོར་སྐབས་ཁམས་པའི་དམག་མི་དང་མཉམ་དུ་ཐུག་འཕྲད་བྱུང་བས་ང་ཁོ་ཚོ་དང་མཉམ་དུ་འགྲོགས་པ་ཡིན་ལ། ང་ཚོ་དམག་རྒྱག་གིན་རྒྱག་གིན་རྒྱ་གར་ས་མཚམས་ལ་ཕྱི་ལོ་ ༡༩༦༡ ཟླ་ ༡༡ ནང་ལ་འབྱོར་སོང༌། དེ་སྐབས་ལག་ཆ་ཚང་མ་རྒྱ་གར་དམག་མི་ལ་རྩིས་མི་སྤྲོད་ཁ་མེད་བྱུང་སོང༌། རྒྱ་གར་ནུབ་ཕྱོགས་ལ་དྭགས་ས་མཚམས་སུ་འབྱོར་རྗེས་ལ་དྭགས་ནས་རྡ་རམ་ས་ལར་ཕྱི་ལོ་ ༡༩༦༨ ལོར་ྋགོང་ས་མཆོག་ལ་མཇལ་ཁ་ཞུ་རྒྱུའི་གོ་སྐབས་རགས་སོང༌། ཕྱི་ལོ་ ༡༩༦༣ ཟླ་ ༣ ཚེས་ ༡ ཉིན་རྒྱ་གར་དམག་སྡེ་ཨང་ ༢༢ ནང་ཚུད་སོང་བར་མ་ཟད་དམག་ཁོངས་སུ་ལོ་ངོ་བཅུ་གསུམ་རིང་ཞབས་ཞུ་ཞུས། འོན་ཀྱང་སྟབས་མ་ལེགས་པ་ཞིག་ལ་དམག་སྒར་གྱི་སྦྱང་བརྡར་གནམ་མཆོང་སྐབས་སུ་རང་ཉིད་རྐང་པ་ཆག་ནས་དགོངས་ཞུ་བྱ་དགོས་བྱུང་སོང༌། དེ་ནས་ཕྱི་ལོ་ ༡༩༧༧ ནས་ད་བར་ལ་དྭགས་ས་གནས་ཆུ་བཞི་སྒང་དྲུག་གི་ཚོགས་པའི་ལས་དོན་ལ་ལྷག་བསམ་རྣམ་དག་ངང་ཞབས་ཞུ་བྱེད་མོས་ཀྱི་ལོ་རྒྱུས་སུ། ཕྱི་ལོ་ ༢༠༠༩ ཟླ་ ༢ ཚེས་ ༢༥ ཉིན་ག་བ་ཐུབ་བསྟན་བསྟན་འཛིན་པས་ཕུལ།

དེ་ལས་མང༌།: ལ་དྭགས་ས་གནས་མདོ་ཁམས་ཆུ་བཞི་སྒང་དྲུག་གི་རྒྱུན་ལས།