Regd. no. s.23417 of 1992

སྦེལ་ལྗམ་ས་གནས་མདོ་ཁམས་ཆུ་སྒང་གིས་༸གོང་ས་མཆོག་གི་འཁྲུངས་སྐར་སྲུང་བརྩི་དང་བསྒྲགས་མཛད་སྒོ་ཟབ་རྒྱས་ཞིག་འཚོགས་པ།

སྦེལ་ལྗེམ་ས་གནས་མདོ་ཁམས་ཆུ་བཞི་སྒང་དྲུག་གིས་གནས་ཚུལ་བཏང་གསལ་ལྟར་ན། ཕྱི་ལོ་ ༢༠༡༠ ཟླ ༧ ཚེས་ ༡༧ ཉིན་༸སྤྱི་ནོར་༸གོང་ས་སྐྱབས་མགོན་ཆེན་པོའི་སྐུ་ཡི་འཁྲུངས་སྐར་དང་བསྟུན། ས་གནས་དེ་གའི་ཆེས་མཐོའི་གནད་ཡོད་མི་སྣ་ཁག་དང་། ས་གནས་དེར་ཡོད་པའི་ཁམས་རིགས་མི་མང་ཉིས་བརྒྱ་ལྷག་རྒྱས་འཛོམས་ཐོག་ས་གནས་ཆུ་སྒང་གི་ཚོགས་གཙོ་མཆོག་ནས་སྐུ་ཡི་འཁྲུངས་སྐར་གྱི་ངོ་སྤྲོད་དང་བསྒྲགས། དོན་ཚན་གསུམ་ཅན་གྱི་གཏམ་བཤད་ཞིག་གནང་ཡོད་ལ། དོན་ཚན་དང་པོའི་ནང་༸གོང་ས་མཆོག་གི་མཛད་འཕྲིན་གྱི་སྐོར་དང། དོན་ཚན་གཉིས་པ་དང་གསུམ་པར་མདོ་ཁམས་ཆུ་བཞི་སྒང་དྲུག་འདི་ཉིད་ཐོག་མར་དབུ་བརྙེས་པ་ནས་བཟུང་ཐོག་མའི་དམིགས་ཡུལ་དང་མཐུན་པར། གཞོན་སྐྱེས་རྣམས་ནས་འདས་པའི་དཔའ་བོ་དཔའ་མོ་རྣམས་ཀྱི་བྱས་རྗེས་རླབས་ཆེན་དེ་དག་རྗེས་དྲན་ཞུ་དགོས་པའི་སྐོར་དང་། བོད་མི་ཕན་ཚུན་བསམ་པ་གཅིག་སྒྲིལ་དང་རོགས་རམ་གང་ཐུབ་ཞུ་དགོས་པ་དང། མ་འོངས་པར་དགོས་ངེས་ཀྱི་ཆ་རྐྱེན་ཁག་ཚང་ཚེ་མདོ་ཁམས་ཆུ་བཞི་སྒང་དྲུག་གིས་བོད་ཀྱི་བསྟན་སྲིད་ཀྱི་དོན་དུ་མི་རྒྱུ་གཉིས་ཀ་བཏང་སྟེ་རླབས་ཆེན་གྱི་བྱ་བཞག་བསྒྲུབས་ཡོད་པ་རྣམས་དེང་དུས་དང་འཚམས་པར་བརྙན་འཕྲིན་གྱི་ལམ་ནས་འཛམ་གླིང་རྒྱ་ཆེའི་མང་ཚོགས་ཀྱི་མདུན་དུ་འབུལ་ཐབས་བྱ་དགོས་པ་སོགས་ཀྱི་གཏམ་བཤད་གནང་ཡོད་པ་དང། དེ་རྗེས་འགོ་མངས་ལྷན་འཛོམས་ཐོག་ཐུགས་སྤྲོ་ཟབ་རྒྱས་ཞིག་ཀྱང་བཏང་ནས་མཐར་མཛད་སྒོ་རྒྱལ་ཁའི་ངང་གྲོལ་ཡོད་པའི་གནས་ཚུལ་ཐོན་ཡོད་པ་རེད།