བོད་གཞུང་མང་རྒྱལ་ཡོངས་ཚོགས་ཆེན་ཐེངས་དང་པོ་དེ་རྒྱ་གར་ལྷོ་ཕྱོགས་བྷེ་ལ་ཀུ་པིས་སུ་ཕྱི་ལོ་ ༢༠༡༠ ཟླ ༨ཚེས ༢༦ ནས ༣༡ བར་བསྐོང་འཚོགས་གནང་རྒྱུ་དང་། དེ་རྗེས་ཕྱི་ཟླ་ ༩ ཚེས ༡ ཉིན་༸སྤྱི་ནོར༸གོང་ས་སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་མ་ཟད་ཚེས་ ༢ ཉིན་བོད་གཞུང་མང་གཙོ་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་ཟབ་རྒྱས་ཤིག་བསྲུང་བརྩི་གནང་འཆར་ཡོད་པ་ལྟར། སྐབས་དེར་གཞུང་འབྲེལ་གྱིས་ཆོལ་ཁ་རེ་ནས་སྐུ་ཚབ་འཐུས་མི་གཉིས་རེ་དགོས་ཤེས་བོད་མི་མང་སྤྱི་འཐུས་ལྷན་ཁང་ནས་ཆོལ་ཁ་སོ་སོར་ཚོགས་བརྡ་འབྱོར་ཡོད་པ་རེད།  ༢༠༡༠ ཟླ་ ༦ ཚེས ༡ དང ༢ ཉིན་གཉིས་རིང་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་རྒྱུན་ལས་ལྷན་ཚོགས་ཐེངས་བརྒྱད་པ་དེ་རྒྱ་གར་གྱི་རྒྱལ་ས་ལྡི་ལིར་བསྐོང་འཚོགས་གནང་སྐབས་མདོ་སྟོད་ཆོལ་ཁའི་སྐུ་ཚབ་འཐུས་མི་ཆུ་སྒང་དབུས་རྒྱུན་ལས་ནང་ཆེན་ཨ་རྡོ་དང་། ཀོང་པོ་ཕུར་བུ་ཚེ་རིང་གཉིས་ལ་གཏན་ཁེལ་གནང་བའི་གནས་ཚུལ་ཐོན་འདུག

ཕྱི་ལོ་ ༢༠༡༠ ཟླ ༦ ཚེས ༡ ནས་ཉིན་ཤས་རིང་མདོ་ཁམས་ཆུ་བཞི་སྒང་དྲུག་སྐབས་བཅོ་བརྒྱད་པའི་དབུས་སྤྱི་ཁྱབ་རྒྱུན་ལས་ལྷན་ཚོགས་ཐེངས་བརྒྱད་པ་དེ་རྒྱ་གར་གྱི་རྒྱལ་ས་ལྡི་ལིར་བསྐོང་འཚོགས་གནང་རྒྱུ་ཡིན་པ་རེད། དབུས་རྒྱུན་ལྷན་ཚོགས་ཐེངས་བརྒྱད་པའི་ཐོག་མདོ་ཁམས་ཆུ་སྒང་ཚོགས་པའི་སྒྲིག་དོན་གཞིར་བཟུང་འགན་ལྷན་ཐེངས་ ༤༠ པའི་གྲོས་ཆོད་ལག་བསྟར་ཟིན་པ་རྣམས་ཀྱི་གྲུབ་འབྲས་ལ་ཞིབ་འཇུག་དང་། འདས་པའི་ཟླ་བ་གསུམ་ནང་ཚུན་མདོ་ཁམས་ཆུ་སྒང་ཚོགས་པའི་བཏང་ཡོང་གི་རྩིས་ཁྲར་ནང་ཞིབ་བྱ་རྒྱུ་མ་ཟད། ས་གནས་རྒྱུན་ལས་ཁག་གིས་སྐབས་བཅོ་ལྔ་པའི་བོད་མི་མང་མདོ་སྟོད་སྤྱི་འཐུས་རྣམ་པའི་འོས་གཞིའི་མི་འགྲོ་གཏོང་འབྱོར་བྱུང་བ་ནས་ཆ་རྐྱེན་ཚང་རིགས་སྤྱི་འཐུས་ཀྱི་སྔོན་འགྲོའི་འོས་གཞིར་གྲངས་ཚད་ངེས་ཅན་ཞིག་གཏན་འབེབས་གནང་རྒྱུ་ཡིན། དེ་བཞིན་སྒྲིག་གཞིའི་དགོངས་དོན་གཞིར་བཟུང་འོས་ཆོས་ཚང་བའི་སྔོན་འགྲོའི་འོས་གཞིའི་ས་བོན་བྱུང་བ་རྣམས་གཞི་རྩར་བཞག་སྟེ་སྐབས་བཅུ་དགུ་པའི་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཀྱི་སྔོན་འགྲོའི་འོས་གཞི་གཏན་འབེབས་གནང་རྒྱུ་ཡིན་སྟབས་ས་གནས་ཁག་སོ་སོའི་ཕྱི་ཟླ་ ༦ ཚེས ༡ ནང་ཚུན་འོས་གཞིའི་ས་བོན་གྱི་སྙན་ཐོ་འདི་ག་དབུས་སྤྱི་ཁྱབ་རྒྱུན་ལས་ཁང་དུ་མ་འབྱོར་ཚེ་རང་བཞིན་གྱིས་རྩིས་མེད་དུ་འགྲོ་རྒྱུ་ཡིན་པས་དེ་དོན་དགོངས་འཇགས་ཡོད་པ་ཞུ།

མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གིས་ཕྱི་ལོ་ ༢༠༡༠ ཟླ ༥ ཚེས ༢༠ ལ་ཕུལ།